Eleanitz

Eleanitz proiektua
Ikastolan Eleanitz proiektuaren planteamendua euskara hizkuntza nagusi delarik, gaztelania (hegoaldean) edo frantsesa (iparraldean), bi hizkuntzak ondo ezagutzeko eta erabiltzeko gaitasuna lortzea da baita, eleaniztasunaren planteamenduari eutsiz, atzerriko hizkuntzen ezagutza eta erabilera ere.
Gure ikastolan atzerriko bi hizkuntza lantzen ditugu: ingelesa eta frantsesa.
INGELESA:
Guztiok ondo dakigun modura, Ikastolen Elkarteak bultzatu eta babesten duen proiektua da Eleanitz proiektua eta INGELESA 4 URTETIK  AURRERA hezkuntzako programan txertatzea du helburu.
Gure ikastolan 95-96 ikasturtean heldu genion apustu honi. Hasieratik, Ikastolen Elkarteak gidatutako proiektua izan da baliabideetan, materialetan eta metodologian. 
Metodologiaz:
  • 4. maila arte, antzeztutako ipuinak dira metodologiaren oinarri nagusi. Taldean antzezten dira, ahoz. Ez da inongo itzulpenik edo irudirik erabiltzen,  baina keinu eta ipuinetako pertsonaiak leku zehatz batekin identifikatuz elkar ulertzen dugu.
    Ikasturte honetan ere, Munchy panpinaren proiektuarekin jarraituko dugu martxan 5 urteko ikasleekin.
  • HH eta lehen bi zikloetan, ahoz antzeztutakoa sendotzeko,  hainbat jarduera egiten dira: muralak, liburuxkak, hiztegia lantzeko jokoak, abestiak, txotxongiloak,  marrazkiak... Ikasleek parte hartzea izaten da helburu nagusia.
  • Lehen Hezkuntzako 5. eta 6. mailetan, gai desberdinen inguruan (animaliak, elikadura...) proiektuak egiten dira.
    Hau guztia osatzeko, lehengo ikasturtean “Haurtzaro English” bloga sortu genuen. Bertara, gelan egiten den lanaren inguruko hainbat bideo eta argazki igotzen ditugu. Ez hori bakarrik, bloga, zikloka banatuta dago eta maila bakoitzean egiten denaren osagarri gisa, hainbat ariketa, bideo eta joko dituzue etxean ingelesa modu dibertigarrian lantzen jarraitzeko aukera duzuelarik.
  • DBH 1go, 2. Hezkuntzako curriculumean barne dauden arloetako atal desberdinak (musika, zientzia...) lantzen dira.                 
  • DBH 3. eta 4. mailan gizarte arloa erabat ingelesez lantzen dute, honela  ingelesa ikasteaz gain, beste arlo bat ikasteko hizkuntza hau erabiliaz. 
Gogoratu behar dugu lan honi etengabeko jarraipena egiten zaiola, irakasleen formazioan eta ikasleen ebaluazioan. Jarraipen honetako ondorioetatik abiatuz, etengabeko doiketan egiten gara ikas-irakas prozesuan.
Grafikoan ikus daiteke Eleanitz proiektua nola txertatzen den 4 urtetik 18 urte bitartean.
Eskola garaia bukatzean, proiektu honen barruan baditugu hainbat eskaintza, besteak beste:
Enjoy English
Udari begira azkeneko hamaika ikasturteen bukaeran Haurtzaro Ikastolak Ikastolen Elkartearen eskutik eratu duen ekintza nagusiak ingelesezko izena du: Enjoy English. “Ingelesarekin goza ezazu”. Helburua: ikasleak ikasturtean ikasitakoa udan sendotzea Britainia Handiko begiraleekin. Bitartekoak: Britainia Handiko begiraleak eta era dibertigarrian (eskulan, jolas, kanta, antzerki, kirol, ipuinak) ingelesez gozatzeko gogoa. Nolabait,  Ikastolan bertan martxan dagoen Eleanitz Proiektuaren jarraipen gisara planteatua dago udako hilabete hau. Enjoy English-en abantaila nagusia horixe da, jolas eginez ere, ingelesa erabiltzen dutela ikasleek.
Ikastaro honi amaiera emateko jaialdi bat antolatzen dugu, eta hainbat antzerki eta kanta  eskaini. The final show izaten da gurasoei eskaintzen zaien jaialdiaren izena. Bertan, ikasle bakoitzari ikastaroan parte hartu duen agiria ematen  zaio,  eta begiraleari ere diploma ematen zaio.
Ingeles udalekuak
Honen jarraipen modura ingeles udalekuak antolatzen dira Euskal Herriko hainbat herrietan, 15 eguneko egonaldiak burutzen dituzte bertan aukera hau egiten duten gaztetxoek, eta bertan 15 egun ingelesez bizitzeko aukera dute.
FRANTSESA:
Eleanitz proiektua dela eta, frantsesaren trataera aipatzekoa da. Ikasturte honetan ere hautazko gisara planteatzen eta txertatzen  da DBH 1go mailatik 4.mailara. Astean bi saio dira. Hautazkoa izanik, ikasleen motibazioak zer esan handia du ikas-irakaskuntzako prozesuan. Horren ondorioz, frantsesaren helburu nagusia ikasleak gaitasun komunikatiboetan trebatzea da. Horretarako, lehenengo saiotik frantsesa da erabiltzen den hizkuntza ikas-irakaskuntzako prozesuan.
Ikasleei, ez zaie arrotza egiten estrategia linguistikoak landuta baitakartzate beste hiru hizkuntzetan eta erraza gertatzen baitzaie frantsesera transferentzia horiek egitea. Pentsa dezagun 12 urte bitarte euskara, ingelesa eta gaztelania landu dituztela, beraz laugarren hizkuntzarekin hasterakoan beren aurre-ezagupenak asko laguntzen diete.
Proiektu honetan Bretainiako Guisseni herriko diwan ikastetxearekin elkartrukea bideratzen da bi urtez behin eta dagoeneko 5 alditan gauzatu da. Oso esperientzia  aberats eta positibotzat baloratzen da bai ikasle, familia, nahiz irakasle klaustroak kultur arteko ezagutza gauzatzen baita.